Тошкентда йўл ўпирилиб тушди
Воқеа жойига бош вазир ўринбосари О. Раматов ва пойтахт ҳокими етиб келди, дея хабар бермоқда Zamon.uz мухбири.
Тошкент шаҳар ҳокимлиги бугун Темур Малик ва Буюк Ипак йўли кўчалари кесишмаси атрофидаги туннель йўлида тиргак деворнинг бир қисми қисман ўпирилиб тушгани юзасидан муносабат билдирди.
Дастлабки маълумотларга кўра, жабрланганлар қайд этилмаган. Воқеа жойига зудлик билан авария хизматлари, техник мутахассислар ва масъул ташкилотлар вакиллари юборилган. Ҳодиса содир бўлган ҳудуд ўраб олинган, зарур хавфсизлик чоралари кучайтирилган.
Ҳокимлик ҳозирда комплекс техник текширув ўтказилаётганини, текширув якунланмагунча, узил-кесил хулоса чиқаришга ҳали эрта эканини билдирди.
Дастлабки тахминлар қаторида сўнгги кунлардаги кучли ёғингарчилик таъсири, жумладан, тупроқнинг ҳаддан ташқари намланиши ва конструкцияга тушадиган юкламанинг ортиши каби омиллар кўриб чиқилмоқда.
Шу билан бирга, лойиҳавий ечимлар, қурилиш-монтаж ишлари сифати, дренаж тизимининг ҳолати, қурилиш назорати ҳамда объектни қабул қилиб олиш тартиби каби барча тегишли ҳолатлар ҳам текширилмоқда.
“Техник текширув якунлари бўйича тиклаш ишлари юзасидан қарор қабул қилинади. Қоидабузарликлар ёки ишларнинг лозим даражада бажарилмаганлиги аниқланса, масъул шахсларни белгиланган тартибда жавобгарликка тортиш чоралари кўрилади”, дейилади ҳокимлик хабарида.
