Ёшлар – янги ғоялар манбаи: ёш журналистлар билан очиқ суҳбат

Тадбир мамлакатимизда ёшларни қўллаб-қувватлаш, уларнинг салоҳиятини рўёбга чиқариш ҳамда жамият ҳаётидаги фаоллигини оширишга қаратилган давлат сиёсати доирасида ташкил этилди. Хусусан, Ўзбекистон Республикаси Президенти томонидан амалга оширилаётган ёшлар сиёсати доирасида ёшларнинг таълим олиши, касб эгаллаши, ижодий ва профессионал ривожланиши учун кенг имкониятлар яратилаётгани таъкидланди.

 

Очиқ мулоқот ёш журналистларни қўллаб-қувватлаш, уларнинг касбий ривожи учун яратилаётган имкониятлар ҳақида маълумот бериш ҳамда медиа соҳасидаги долзарб масалалар юзасидан фикр алмашиш мақсадида ўтказилди. Тадбирда турли оммавий ахборот воситаларида фаолият юритаётган ёш журналистлар ҳамда журналистика йўналишида таҳсил олаётган талабалар иштирок этди. 

 

Мулоқот давомида ёшлар Ўзбекистон Журналистлар уюшмаси раҳбариятига ўзларини қизиқтирган саволлар билан мурожаат қилди. Журналистика соҳасидаги истиқболли лойиҳалар, ижодий ташаббуслар ҳамда хорижий ҳамкорлик масалалари юзасидан очиқ фикр алмашилди.Шунингдек, тадбирда ташкилий масалалар юзасидан ҳам маълумот берилди. Жумладан, Орипов Шухратжон Орип ўғли Ўзбекистон Журналистлар уюшмаси раиси вазифасини бажарувчи этиб тайинлангани маълум қилинди. 

 

Шуҳрат Ориповнинг таъкидлашича, Журналистлар уюшмасининг асосий вазифалари қаторига журналистларнинг ҳуқуқларини ҳимоя қилиш, уларнинг манфаатларини қўллаб-қувватлашга қаратилган лойиҳаларни амалга ошириш, медиамакондаги жараёнларни таҳлил қилиб бориш ҳамда давлат органларига журналистика соҳасини ривожлантириш юзасидан таклифлар киритиш киради. Шунингдек, уюшма ёш журналистларнинг малакаси ва билимларини оширишга қаратилган турли лойиҳаларни ҳам амалга ошириб келмоқда. Ҳозирги кунда уюшма таркибида 2157 нафар аъзо фаолият юритмоқда. 

 

Учрашув давомида уюшма раиси "ёшлар – янги ғоялар манбаи" эканлигини ёш журналистлар билан доимий мулоқот олиб бориш учун алоҳида платформа яратиш таклифини ҳам илгари сурди. Шунингдек, Ёш журналистлар кенгаши фаолиятини такомиллаштириш, ҳар ҳафтанинг пайшанба кунини президентимиз ташаббуси билан ёшлар билан ишлаш куни сифатида белгилаш ҳамда ҳудудларда, таҳририятлар ва олий таълим муассасаларида очиқ мулоқотлар ўтказиб бориш режалаштирилаётгани маълум қилинди.

 

Шу билан бирга мулоқот жараёнида ёшлар томонидан бир қатор таклифлар билдирилди. Жумладан, ёш журналистлар учун медиа ҳуқуқи ва журналист этикаси бўйича профессионал журналистлар иштирокида мастер-класслар ҳамда очиқ дарслар ташкил этиш зарурлиги қайд этилди. Шунингдек, талаба ёшлар амалиёт ўташ жараёнида кўплаб бюрократик тўсиқларга дуч келаётгани, бу борада тизимни соддалаштириш зарурлиги таъкидланди.

 

Бундан ташқари, журналистлар учун сўз эркинлигини таъминлаш, турли босимлардан ҳимоя қилиш, шунингдек, оммавий ахборот воситаларида тарқатилаётган маълумотларни текшириш учун фактчекинг дастурларини жорий этиш бўйича ҳам таклифлар билдирилди.