Ўзбекистонда электр истеъмоли бир кунда 267 млн кВт соатга етиб, рекорд қайд этилди
Ишлаб чиқарилган электр энергиясининг 20,9 фоизи қайта тикланувчи энергия манбалари ҳиссасига тўғри келган.
2026 йил 11 март куни Ўзбекистон энергетика тизимида март ойи учун электр энергияси истеъмоли ва юклама бўйича янги рекорд кўрсаткич қайд этилди. Бу ҳақда Энергетика вазирлиги маълум қилди.
Қайд этилишича, шу куни республика бўйича суткалик электр энергияси истеъмоли 267 млн кВт·соатни ташкил этиб, бу ўтган йилнинг шу даврига нисбатан 14 млн кВт·соатга кўп бўлган.
Кечки юқори истеъмол соатларида энергетика тизимидаги максимал юклама соат 18:12 да 12 680 МВтга етди. Бу кўрсаткич аввалги март ойидаги рекорддан 480 МВтга юқори бўлди.
Мазкур кунда электр станцияларида жами 272 млн кВт·соат электр энергияси ишлаб чиқарилди. Бу ўтган йил март ойидаги ишлаб чиқаришдан 12 млн кВт·соатга кўпдир.
Шунингдек, ишлаб чиқарилган электр энергиясининг 20,9 фоизи қайта тикланувчи энергия манбалари ҳиссасига тўғри келган.
Вазирлик маълумотига кўра, қуёш ва шамол электр станцияларининг улуши 14,3 фоизни ташкил этди. Кундузги соатларда эса электр энергияси балансини таъминлашда қуёш ва шамол станцияларининг ҳиссаси 35 фоизгача етди.
