"Айрим ҳудудлар ҳокимлари сайёр қабулларни "номига" ўтказяпти" — президент
“Бухоро, Кармана, Учқудуқ, Сардоба, Ховос, Бўстонлиқ туманлари, Ангрен, Ғозғон шаҳар ҳокимлари маҳалладаги 4-5 нафар одам билан “номига” гаплашиб, сайёр қабул ўтказдим деб юрибди”, — деди Шавкат Мирзиёев.
Президент раислигида ўтказилаётган видеоселектор йиғилишида мамлакатда аҳоли мурожаатлари билан ишлаш ҳолати таҳлил қилинди.
Маълум қилинишича, республика бўйича ҳар ўн минг кишига ўртача 319 та ариза ва шикоят тўғри келмоқда. Бироқ айрим ҳудудларда бу кўрсаткич анча юқори.
Хусусан, Тошкент шаҳрида ҳар ўн минг аҳолига 535 та мурожаат тўғри келади. Шунингдек, Навоий вилоятида 462 та, Сирдарё ва Сурхондарё вилоятларида 452 тадан, Жиззах вилоятида 430 та, Қашқадарё вилоятида 368 та, Тошкент вилоятида эса 350 та мурожаат қайд этилган.
Деҳқонобод ва Миробод туманлари ҳамда Навоий, Оҳангарон ва Янгиер шаҳарларида ҳар ўн минг аҳолига тўғри келадиган аризалар сони бошқа ҳудудларга нисбатан икки баравар юқори экани таъкидланди.
Йиғилишда мурожаатлар сони республика бўйича ўртача 16 фоизга камайгани айтилган бўлса-да, Қоровулбозор, Нурота, Конимех, Тупроққалъа туманлари ҳамда Наманган шаҳрида бу кўрсаткич ўтган йилга нисбатан 50 фоизгача ошгани қайд этилди.
Шунингдек, Бухоро, Кармана, Учқудуқ, Сардоба, Ховос, Бўстонлиқ туманлари ҳамда Ангрен ва Ғозғон шаҳарларида айрим раҳбарлар сайёр қабулларни юзаки ўтказаётгани танқид қилинди.
