АҚШ ва Исроилнинг Эронга қарши операцияси камида 2–3 ҳафта давом этиши мумкин
Операция доирасида асосий зарбалар Эроннинг Ислом инқилоби қўриқчилари корпусига қаратилган.
Axios нашрининг Исроил ҳукуматдаги хабардор манбаларига таяниб хабар беришича, АҚШ ва Исроил томонидан Эрон ҳудудида олиб борилаётган қўшма ҳарбий операция камида икки-уч ҳафта давом этиши мумкин.
Манбаларга кўра, АҚШ президенти Доналд Трамп ҳарбий операцияларни давом эттириш тарафдори бўлиб, операцияни фаол босқичда олиб боришга қатъий қарор қилган. Шу билан бирга, ҳужумнинг расмий стратегик мақсадлари ҳозирча очиқ эълон қилинмаган.
Нашр суҳбатдошларининг таъкидлашича, Исроил томони АҚШ раҳбари ҳар қандай пайтда кутилмаган қарор қабул қилиб, жанговар ҳаракатларни тўсатдан тўхтатиши мумкинлигидан хавотир билдирмоқда. Уларнинг фикрича, Трамп операцияни тўхтатиб, маълум сабаблар билан Эрон устидан ғалаба қозонилганини эълон қилиши эҳтимоли ҳам мавжуд.
Манбалардан бирининг айтишича, яқинда Оқ уй раҳбари билан мулоқот қилган америкалик инсайдер Трамп “ғайратга тўла” эканини ва операциянинг фаол босқичини чеклаш ниятида эмаслигини билдирган.
Хабарларга кўра, операциянинг асосий зарбалари Ислом инқилоби қўриқчилари корпуси (IRGC) тузилмасига қаратилган. Вашингтон ушбу элита ҳарбий бўлинмаларини заифлаштириш орқали мамлакат давлат аппаратига босим ўтказиш ва ички норозилик кайфиятларини кучайтиришга умид қилмоқда.
