Халқ қабулхоналари тизими янгиланади: аризаларни қабул қилишдан ташқари муаммоларни диагностика қиладиган марказ бўлади
Янги тизим доирасида ҳокимлик, банклар, шаҳар бандлик ва МИБ бўлимлари ҳамкорлигида фуқаролар тадбиркорликка жалб қилинади, ишсизлар ҳудуддаги саноат ва сервис корхоналаридаги вакант ўринларга жойлаштирилади.
Президент Шавкат Мирзиёев 13 март куни видеоселектор йиғилишида Халқ қабулхоналари фаолиятини такомиллаштириш бўйича янги тизимни жорий қилишни маълум қилди.
Маълумотларга кўра, Халқ қабулхоналари ташкил этилган илк йилларда мурожаатларнинг 90–95 фоизи шикоят шаклида бўлган бўлса, ҳозир бу кўрсаткич 60–65 фоизга тушган.
“Бугун одамлар шахсий масаладан кўра, маҳаллаларидаги шароитни яхшилаш бўйича таклиф беришни афзал кўряпти. Лекин муаммоси ҳал бўлмаган фуқаролар раҳбарлар қабулини ташкил қилишни сўрамоқда. Энди ҳокимлар фақат аризада кўтарилган масалани ҳал қилиш билан чекланмайди, балки муаммонинг келиб чиқиш сабабини аниқлаб, ечим топиши зарур”, — деди давлат раҳбари.
Шу боис Халқ қабулхоналари энди фақат ариза қабул қилувчи орган эмас, балки ҳудуддаги муаммоларни диагностика қиладиган марказ сифатида фаолият юритади.
Президент янги тизим қандай ишлашини Қарши шаҳри мисолида тушунтирди. Ўтган йили шаҳар Халқ қабулхонасига 11 мингта мурожаат келиб тушган.
Мисол учун, 255 нафар алимент тўловчининг сабаблари ўрганилганда, уларнинг 193 нафари касб-ҳунари бор бўлишига қарамай ишсиз экани, яна 62 нафари даромадини камайтириб кўрсатаётгани аниқланди.
Янги тизим доирасида ҳокимлик, банклар, шаҳар бандлик ва МИБ бўлимлари ҳамкорлигида фуқаролар тадбиркорликка жалб қилинади, ишсизлар ҳудуддаги саноат ва сервис корхоналаридаги вакант ўринларга жойлаштирилади. Хорижда ишлашни хоҳловчи алимент тўловчилар билан уч томонлама шартнома тузилиб, улар тил ва касбга ўргатилиб, хорижга юқори даромадли ишларга юборилади.
Шунингдек, шаҳар солиқ инспекцияси ва Бош прокуратура департаменти ҳамкорлигида даромадини яшираётганлар аниқланиб, уларнинг фаолияти “соядан” чиқарилади.
Шунда алимент тўловчилар қарамоғида бўлган 700 га яқин боланинг моддий таъминоти ўзгариши таъкидланди.
