“Ички ишлар ходимларининг қўпол муомаласи ва тергов сифати бўйича норозиликлар кўп”
Президент бу борада энг кўп ариза тушган ҳудудларда ходимларнинг касбий ва муомала маданиятини ошириш бўйича ўқитиш шартлигини айтди.
Шавкат Мирзиёев 13 март куни аҳоли мурожаатлари билан ишлаш тизимини такомиллаштириш бўйича ўтказилаётган видеоселектор йиғилишида Ички ишлар ходимларининг қўпол муомаласи ва тергов сифатидан норозиликлар кўп эканини маълум қилди.
Маълум қилинишича, ўтган йили ички ишлар ваколатидаги масалалар бўйича 148 мингдан ортиқ мурожаат келиб тушган.
Йиғилишда тизим масъулларига ҳар 1 минг кишига нисбатан энг кўп ариза тушаётган Денов, Ургут туманлари ҳамда Самарқанд, Қарши, Наманган, Жиззах, Фарғона ва Чирчиқ шаҳарларида аҳоли муаммоларини ўрганиш, профилактика инспектори ва терговчиларнинг касбий ҳамда муомала маданиятини ошириш бўйича ўқитиши шарт экани айтилди.
Шунингдек, Президент фуқаролар туғилганлик тўғрисидаги гувоҳномани олмаган болаларга ҳужжат расмийлаштириш жараёнида қийинчиликлар юзага келаётганига тўхталди. Бу масала бўйича 448 нафар фуқаро мурожаат қилган.
Шавкат Мирзиёев: “Бу боласини боғча ва мактабга жойлаштиришда гувоҳнома талаб қилиниши туфайли мажбурий мурожаат қилганлар, ҳали ариза бермаганлари қанча?” — дея савол қўйди.
Йиғилишда Адлия вазирлигига бу масалага содда ва тезкор ечим ишлаб чиқиш топширилди.
