Маҳаллаларда аҳоли турмушини яхшилаш учун 56 триллион сўм маблағ ажратилади
Шавкат Мирзиёев раислигида аҳоли мурожаатлари билан ишлаш тизимини такомиллаштириш масалаларига бағишланган видеоселектор йиғилиши бўлиб ўтмоқда.
Ўзбекистонда аҳоли сони 38 миллиондан, меҳнатга лаёқатли фуқаролар сони эса 20 миллиондан ошган. Бу ҳақда Шавкат Мирзиёев раислигида ўтказилаётган видеоселектор йиғилишида маълум қилинди.
Йиғилишда маълум қилинишича, сўнгги тўққиз йил ичида аҳолининг даромадлари икки баравар кўпайган.
Давлат раҳбари аҳолининг муаммоларини жойида ҳал этиш мақсадида вазирлар ва ҳокимларнинг маҳаллаларда ишлаб, фуқаролар билан бевосита мулоқот қилиш тизими йўлга қўйилганини эслатди. Жорий йилда ҳам маҳаллаларда аҳоли турмушини яхшилаш учун 56 триллион сўм маблағ ажратилиши режалаштирилгани билдирилди.
Президентнинг таъкидлашича, мавжуд имкониятларга қарамай, аҳоли томонидан кўтарилаётган масалаларга ўз вақтида ечим топиш даражаси танқидий таҳлил қилиниши лозим. Шу муносабат билан давлат идораларини халққа яқинлаштириш мақсадида ташкил этилган Халқ қабулхоналарининг фаолиятини замон талаблари асосида янгилаш зарурлиги қайд этилди.
Йиғилишда бундан буён “Ҳар бир инсон ва хонадон муаммосини билиб, вақтида кўмак бериш” тамойили барча даражадаги ҳокимлар, вазирлар ҳамда уларнинг ҳудудий ташкилотлари раҳбарлари фаолиятининг асосий қоидаси бўлиши кераклиги таъкидланди.
