Нетаняҳу Эроннинг янги олий раҳбарига ва “Ҳизбуллоҳ” етакчисига ўлим билан таҳдид қилди

Исроил бош вазири Бинямин Нетаняҳу Мужтабо Хоманаийга “ҳаёт суғуртаси” бермаслигини айтди. Бу ҳақда Reuters хабар берди.

 

Нетаняҳу Эрон билан уруш бошланганидан буён илк бор матбуот анжуманида иштирок этди. У Эрон “энди аввалгидек эмаслигини” ва Ислом инқилоби қўриқчилари корпуси ҳамда Басиж яримҳарбий кучларига зарба берилганини маълум қилди.

 

Шунингдек, у урушга қўшилган Ливаннинг Ҳизбуллоҳ гуруҳи билан ҳужумлар давом этишини билдирди. Эроннинг собиқ олий раҳбари Али Хоманаий 28 февраль куни ҳаво ҳужумлари натижасида ҳалок бўлгач, 2 март куни “Ҳизбуллоҳ” Исроилга қарши зарбалар берди. Хабарларга кўра, Ливан гуруҳи бу ҳаракатни Хоманаийнинг ўлими учун қасос деб атади. Али Хоманаийнинг ўрнини ўғли Мужтабо Хоманаий эгаллади.

 

Нетаняҳу Эроннинг янги олий раҳнамоси ва “Ҳизбуллоҳ” етакчисига қарши қандай чоралар кўрилиши ҳақида сўралганда, у: “Мен террорчи ташкилот раҳбарларидан бирортасига ҳам ҳаёт суғуртаси полисини бермаган бўлардим… Бу ерда нималарни режалаштираётганимиз ёки нима қилмоқчи эканимиз ҳақида аниқ ҳисобот бериш ниятим йўқ”, — деб жавоб берди.

 

Исроил бош вазирининг маълум қилишича, Эронга қилинаётган ҳужумнинг мақсади Теҳроннинг ядровий ва баллистик ракета дастурлари туфайли юзага келаётган “экзистенциал таҳдидни бартараф этиш”дир. 

 

Шу билан бирга, у эронликларни ҳукуматга қарши қўзғалонга ундаш орқали режимни ағдаришга чақирган.

 

Нетаняҳу уруш бошланганидан бери Эрон ҳукуматига қарши норозилик аломатлари кузатилмаганини қайд этди ва: “Биз режимни ағдариш учун оптимал шароитларни яратмоқдамиз, аммо Эрон халқи режимни ичкаридан ағдаради. Биз ёрдам бера оламиз ва ёрдам беряпмиз”, — деди.