Нобел мукофоти энди мени қизиқтирмайди — Трамп
АҚШ президенти Эронга қарши операциялар ва Нобел мукофоти ҳақида гапирмаслигини айтди.
АҚШ президенти Дональд Трамп Нобел тинчлик мукофоти масаласини муҳокама қилишни истамаслигини эълон қилди. Washington Examiner журналлиси билан суҳбатда Трампга Эрон билан ҳарбий операция унинг мукофотни ютиш имкониятини оширдими, деган савол берилганида, президент шундай жавоб берди: «Билмайман. Мен энди қизиқмайман».
Шунингдек, яқин кунларда хорижий етакчилар билан олиб борилган суҳбатларда Нобел мукофоти мавзуси кўтарилганми, деган саволга Трамп: «Йўқ, мен Нобел мукофоти ҳақида гапирмаяпман», деб жавоб берган.
2025 йилда Трамп Нобел тинчлик мукофотига номзод бўлиш учун фаол лоббичилик кампаниясини бошлаганди. Ғалаба қозона олмагач, АҚШ президенти энди «тинчлик ҳақида ўйлашга мажбур эмаслигини» билдирган.
2025 йил октябр ойида Нобел тинчлик мукофоти Венесуэла мухолифати етакчиси Мария Корина Мачадога Венесуэлада демократияни ривожлантириш борасидаги саъй-ҳаракатлари учун топширилган. Кейинчалик Мачадо ўз мукофотини Америка президентига топширишга тайёрлигини айтган ва бу мукофот Венесуэла халқидан эканлигини ҳамда улар «албатта уни у [Трамп] билан баҳам кўришни исташларини» таъкидлаган. Мачадо 16 январ куни Оқ уйда бўлиб ўтган учрашувда президентга Нобел мукофоти медалини топширган.
