Озарбайжонда қўлга олинган қўқонлик табиб қўйиб юборилди
Иқболжон Солиев Бокудаги хусусий шифохонада беморларни рухсатсиз кўрикдан ўтказгани учун ҳибсга олинган эди.
Халқ табобати билан шуғулланувчи Иқбол Солиев Озарбайжоннинг Боку шаҳридаги BI ES VIP клиникасида қўлга олинганди. У орадан кўп вақт ўтмай қўйиб юборилди. Бу ҳақда Lenta.az хабар берди.
Маълум қилинишича, полиция бўлимида Иқбол Солиевга нисбатан қонунчиликка мувофиқ тегишли интизомий чоралар кўрилган.
Шундан сўнг уни Озарбайжондан чиқариб юбориш таъминланган.
Солиев Бокудаги клиникалардан бирида беморларни рухсатсиз тарзда қабул қилгани ортидан ҳибсга олинган эди. Унинг қабулига келганлар сони кўплиги сабаб муассаса ҳудудида катта навбатлар ва тартибсизликлар юзага келган. У ўзини биоэнергия, энергия терапияси билан даволовчи сифатида таништириб, ҳар бир бемор учун 60 манат (400 минг сўм) атрофида ҳақ олган.
Клиника маъмурияти эса Солиев ушбу тиббиёт муассасасининг расмий ходими эмаслигини билдирган. Шунга қарамай, у икки кун давомида беморларни қабул қилганидан сўнг клиникани тарк этган.
Аввалроқ Солиев Фарғона вилоят суди қарорига кўра 10 суткага қамалган эди. Кейинчалик у ўзининг Instagram саҳифасида озодликка чиққанини маълум қилиб, табобат фаолияти учун расмий рухсати йўқлиги ҳақидаги хабарларни рад этган.
