Покистондaн Ўзбекистонгa илк чартер юк рейси орқали 17 тонна гўшт олиб келинди
Ҳаво юк ташиш ҳажми босқичма-босқич 100 тоннaгача оширилиши режалаштирилган.
Ўзбекистон ва Покистон ўртасида озиқ-овқат таъминоти соҳасида икки мамлакат ўртасидаги ҳамкорликни ривожлантиришга қаратилган биринчи чартер юк рейси муваффақиятли якунланди.
12 март куни маҳаллий вақт билан соат 21:10 да Лаҳордан келган Boeing 737 самолёти орқали Тошкент халқаро аэропортига озиқ-овқат маҳсулотлари, хусусан 17 тонна гўшт етказиб берилди.
Парвоз Покистоннинг Air Eagle авиакомпанияси томонидан амалга оширилган. Ушбу рейс Air Speed Charter чартер авиакомпанияси ташаббуси билан бажарилган ва келажакда шунга ўхшаш юк рейсларини мунтазам амалга ошириш режалаштирилган.
Лойиҳага кўра, ҳаво юк ташиш ҳажми босқичма-босқич оширилиши кутилмоқда. Охир-оқибат, ҳар бир рейсда ташиладиган юк ҳажми 100 тоннaгача етказилиши режалаштирилган.
