Россия Эрондаги уруш туфайли нефтдан кунига қўшимча 150 миллион доллар даромад олмоқда
Яқин Шарқдаги кескинлик Россияга 12 кун ичида жами 1,3-1,9 миллиард доллар даромад келтирди.
Яқин Шарқдаги вазият кучайиши ва нефть нархининг ўсиши туфайли Россия хомашё экспортидан қўшимча даромад олмоқда. Financial Timesнинг тахминларига кўра, ҳозирда Россия бюджети режалаштирилган даромаддан кунига тахминан 150 миллион доллар қўшимча тушум олмоқда.
Маълум қилинишича, урушнинг дастлабки 12 кунида Россиянинг нефть даромади 1,3–1,9 миллиард долларга ошган. Агар нефть нархи баррель учун 70–80 доллар атрофида қолаверса, март ойида Россия бюджетига тушадиган қўшимча даромад 3,3–4,9 миллиард долларни ташкил қилиши мумкин.
АҚШ Ҳиндистонга Россия нефтини сотиб олишни вақтинчалик кўпайтиришга рухсат бергач, Ҳиндистон компаниялари янги шартномаларни тезлаштирди.
Financial Times маълумотига кўра, фақат беш кун ичида улар тахминан 30 миллион баррель нефт етказиб бериш бўйича келишувга эришди – бу февраль ойида сотиб олинган жами миқдор билан тенг.
Шунингдек, Хитой нефтни қайта ишлаш корхоналари ҳам харидларни оширмоқда. Таҳлилчиларнинг қайд этишича, агар инқироз давом этса, Ҳиндистон ва Хитой Россия нефти учун рақобатга киришиши мумкин, бу эса ҳозирда бир баррель нефть нархининг (85 доллар) янада ошишига олиб келади.
