Россияда 15 кишилик наркогуруҳ қўлга олинди, улар орасида ўзбекистонликлар ҳам бор
44 килограммдан ортиқ гиёҳванд модда мусодара қилинди.
Россиянинг Челябинск вилоятида уюшган жиноий гуруҳ фаолияти юзасидан олиб борилган тергов якунга етди. Мазкур иш доирасида 15 нафар шахс уюшган жиноятчилик гуруҳида иштирок этиш ҳамда гиёҳванд моддаларни ноқонуний айланишда айбланмоқда. Бу ҳақда ТАСС хабар берди.
Тергов маълумотларига кўра, гумонланувчилар орасида Ўзбекистон, Тожикистон ҳамда Россия фуқаролари бор. Улар турли ҳудудларда фаолият юритган йирик наркогуруҳ таркибида ишлаганликда гумон қилинмоқда.
Аниқланишича, жиноий гуруҳ гиёҳванд моддаларни интернет орқали ташкил этилган онлайн-дўконлар орқали тарқатиб келган. Нарко моддалар Свердловск вилояти, Курган вилояти, Воронеж вилояти, Москва вилояти ҳамда Перм олқаси ҳудудларида ҳам тарқатилган.
Ҳуқуқ-тартибот идоралари томонидан ўтказилган тезкор тадбирлар давомида гумонланувчилардан героин ва метадон каби 44 килограммдан ортиқ гиёҳванд моддалар мусодара қилинган.
Тергов материалларига кўра, мазкур гуруҳ жами 134 та турли оғирликдаги гиёҳванд моддалар билан боғлиқ жиноятларни содир этган.
Барча гумонланувчилар ҳибсга олинган. Уларга нисбатан жиноий ташкилотда иштирок этиш ҳамда гиёҳванд моддалар савдосига уриниш бўйича айбловлар қўйилган. Жиноят иши Курчатовский туман судига юборилган бўлиб, суд жараёни яқин кунларда бошланиши кутилмоқда.
