Саудия Арабистонидан ўзбекистонликларни эвакуация қилиш ишлари якунланди.
Яқин Шарқдан 32 мингдан ортиқ Ўзбекистон фуқароси эвакуация қилинди.
13 март куни соат 07:00 ҳолатига кўра, хорижда бўлган 32 934 нафар Ўзбекистон фуқароси Ватанга қайтарилган. Бу ҳақда Ташқи ишлар вазирлиги матбуот хизмати хабар берди.
Маълум қилинишича, 12 март куни Ўзбекистоннинг Қатардаги элчихонаси кўмагида 49 нафар фуқаро БАА ва Саудия Арабистонига етказилиб, у ердан Тошкентга учиб кетиши таъминланган.
“Ҳозирда навбатдаги фуқаролар гуруҳи шакллантирилмоқда ва уларнинг Доҳа шаҳридан Дубай орқали Ўзбекистонга қайтиши масаласи кўриб чиқилмоқда”, дейилади вазирлик хабарида.
БААдаги дипломатик ваколатхоналар ёрдамида 147 нафар фуқаро Тошкентга жўнатилган. Эрондаги элчихона эса 5 нафар ватандошнинг қўшни давлатлар ҳудуди орқали чиқиб кетишига кўмаклашган.
Шу билан бирга, Исроилда бўлган 4 нафар Ўзбекистон фуқаросининг Миср орқали Ватанга қайтиши ташкил этилган.
Шунингдек, Ўзбекистоннинг Саудия Арабистонидаги элчихонаси, Жидда шаҳридаги бош консулхонаси ҳамда Транспорт вазирлиги ҳамкорлигида чартер рейслари орқали 2 735 нафар фуқаро Ўзбекистонга қайтарилган. Мазкур мамлакатда эвакуация жараёни якунланган.
Ташқи ишлар вазирлигига кўра, Ўзбекистон фуқароларини хавфсиз тарзда Ватанга қайтариш бўйича дипломатик ваколатхоналар фаолияти давом этмоқда.
