Тошкентда ФВБ ходими 1500 доллар пора билан қўлга тушди
У корхона раҳбаридан ёнғин хавфсизлиги жиҳозларини қабул қилиш бўйича баённома расмийлаштириб бериш эвазига пул талаб қилган.
Давлат хавфсизлик хизматининг Тошкент шаҳри бўйича бошқармаси ходимлари томонидан Иқтисодий жиноятларга қарши курашиш департаменти билан ҳамкорликда ўтказилган тезкор тадбирда Фавқулодда вазиятлар вазирлигининг Янги Ҳаёт туман бўлими кичик инспектори пора олаётган вақтида ашёвий далиллар билан ушланди. Бу ҳақда ДХХ Zamon.uzга хабар берди.
Аниқланишича, мансабдор шахс хизмат мавқеини суиистеъмол қилиб, маҳаллий МЧЖ раҳбаридан 1500 АҚШ доллари талаб қилган. У ҳамкасблари орқали мазкур туман ҳудудида фаолият юритаётган корхонага ўрнатилган ёнғин хавфсизлиги жиҳозларини қабул қилиш бўйича баённома расмийлаштириб бериш эвазига ушбу пулни сўраган.
Ўтказилган тезкор тадбир давомида у пул маблағларини олаётган вақтида қўлга олинган.
Мазкур ҳолат юзасидан унга нисбатан Жиноят кодексининг 168-моддаси 3-қисми “в” банди ҳамда 28, 211-моддаси 1-қисми билан жиноят иши қўзғатилиб, гумонланувчига нисбатан “қамоқ” эҳтиёт чораси қўлланилган ва тергов ҳаракатлари олиб борилмоқда.
