Туркия устида урилган ракeталар учинчи томон томонидан отилган — Эрон элчиси
Элчининг таъкидлашича ҳодиса дўстона муносабатларга путур етказишга қаратилган бўлиши мумкин.
Эроннинг Анкарадаги элчиси Муҳаммад Ҳасан Ҳабибуллоҳзода Туркия устида урилган ракeталар ҳодисасида мамлакати алоқадор эмаслигини ва ҳодисани қўшма ишчи гуруҳ томонидан текширишни кутаётганини маълум қилди.
“Биз Туркиянинг миллий суверенитетини ҳурмат қиламиз. Шу муносабат билан, қуралли кучларимиз, Бош штаб ва Ташқи ишлар вазирлиги илгари бирон бир ракета ёки ўқ-дорилар ҳужумини рад этган баёнот беришган эди. Ҳодисани батафсилроқ текшириш учун гуруҳ тузишни таклиф қилдик. Бизнинг фикримизча, бу ҳаракатлар мамлакатларимиз ўртасидаги дўстона ва қардошлик муносабатларига путур етказишга қаратилган учинчи томонлар томонидан содир этилган бўлиши мумкин”, деган элчи Анкарада журналистларга.
Ҳабибуллоҳзода минтақадаги ҳарбий вазиятга изоҳ берар экан, Эрон “ҳеч кимга ҳужум қилмаганини” таъкидлади: “Улар бизга ҳужум қилишди. Музокаралар давомида бизга ҳужум қилинди, АҚШ дипломатияга хиёнат қилди. Ҳужумлар ядровий музокаралар техник босқичга етаётган пайтда бошланди”, деди элчи.
Элчи шунингдек, Эрон ўзини қонуний йўллар билан ҳимоя қилаётганини қайд этган: “Биз мамлакатимизни ҳимоя қиламиз. Ҳозир ҳам, сиз билан гаплашаяпман, мамлакатим ҳужум остида. Касалхоналар, инфратузилма ва банкларга ҳужум қилиняпти ва кўплаб тинч аҳоли ҳалок бўляпти”, деб қўшимча қилган у.
