Устюртдаги қудуқдан катта босим билан табиий газ оқими олинди
Табиий газ истеъмолчиларга етказиш мақсадида қудуқ газ инфратузилмасига уланади.
12 март куни Ғарбий Қуйи Сургил конига қарашли 17-сон баҳолаш ишлатиш қудуғидан катта босим билан саноат миқёсидаги табиий газ оқими олинди. Бу ҳақда “Ўзбекнефтгаз” АЖ хабар берди.
“Ўзбекнефтгаз” АЖ хабарига кўра, мазкур геологик-техник тадбирлар табиий газ қазиб олиш ва заҳираларни кўпайтириш мақсадида Устюрт ҳудудида амалга оширилмоқда.
Маълум қилинишича, қудуқ мутахассислар томонидан бурғиланиб, геологик-геофизик маълумотлар таҳлили асосида 4597–4750 метр чуқурликдаги истиқболли қатламлардан газ оқими олинди.
Ҳозирда янги маҳсулдор қатламлардан олинаётган табиий газни истеъмолчиларга етказиш учун ер усти саноат майдонларини технологик жиҳозлаш, газ узатиш қувурлари ва тармоқларни қуриш, шунингдек қудуқни ишга тушириш бўйича якуний босқичдаги гидродинамик тадқиқот ишлари олиб борилмоқда.
Тез кунларда табиий газ истеъмолчиларга етказиш мақсадида қудуқ газ инфратузилмасига уланади.
