Дунё соғлиқни сақлашдан кўра урушларга кўпроқ маблағ сарфламоқда — ЖССТ
2025 йилда глобал ҳарбий харажатлар 2,7 триллион долларга етгани маълум қилинди.
Жаҳон соғлиқни сақлаш ташкилоти бош директори Тедрос Адханом Гебрейесус 13-Глобал Боку форумида мамлакатларни ҳарбий харажатларни ошириш ўрнига устуворликларини қайта кўриб чиқишга ва келажакдаги пандемияларга тайёргарликни кучайтиришга чақирди.
Унинг таъкидлашича, глобал ҳарбий харажатлар 2025 йилда 2,7 триллион долларга етган бўлиб, бу 2030 йилга келиб очарчиликни тугатиш учун зарур бўлган маблағдан қарийб 30 баробар кўпдир.
Шунингдек, у COVID-19 пандемиясини “кўринмас душман” деб атаб, бу касаллик тахминан 20 миллион инсон ҳаётига зомин бўлганини ва глобал иқтисодиётга 10 триллион доллардан ортиқ зарар етказганини эслатди. Бу кўрсаткич замонавий тарихдаги кўплаб урушларнинг иқтисодий оқибатларидан ҳам юқори экани таъкидланди.
Гебрейесуснинг сўзларига кўра, соғлиқни сақлаш соҳаси халқаро ҳамкорлик учун муҳим платформага айланиши керак.
ЖССТга аъзо давлатлар пандемиялар бўйича келишувни қабул қилган бўлиб, у ратификация қилинганидан сўнг глобал тайёргарликни мустаҳкамлашда муҳим воситага айланиши кутилмоқда.
Бундан ташқари, патогенларни алмашиш механизми ҳамда вакциналар ва дори-дармонларга тенг ҳуқуқли киришни таъминлаш бўйича халқаро музокаралар олиб борилмоқда.
“Биз битта турмиз, бир сайёрада яшаяпмиз, бир хил ДНКга эгамиз ва бир хил таҳдидларга дуч келамиз”, — деди Гебрейесус. У мамлакатлар ва халқаро институтлар ўртасидаги ишончни тиклаш келажакдаги глобал инқирозларга самарали жавоб беришнинг муҳим шарти эканини таъкидлади.
