Фарғонада янги туризм маҳсулотлари ва йўналишлари яратилади
Фарғона вилоятида туризм соҳасини ривожлантириш, янги лойиҳаларни шакллантириш ва соҳада мавжуд муаммоларни муҳокама қилиш мақсадида очиқ мулоқот ташкил этилди.
Ўзбекистон Республикаси Туризм қўмитаси раиси А. Аққулов бошчилигидаги республика ишчи гуруҳи Фарғона вилоятига ташриф буюриб, ҳудудда туризм соҳасини ривожлантириш бўйича амалга оширилаётган ишлар билан танишди.
Ўзбекистон Республикаси Президенти Администрацияси топшириғига мувофиқ ташкил этилган ташриф доирасида вилоят ҳокимлиги, тегишли идоралар ҳамда туризм соҳасида фаолият юритаётган 45 нафардан ортиқ маҳаллий тадбиркорлар иштирокида очиқ мулоқот ўтказилди. Учрашувда туроператорлар, меҳмонхоналар, умумий овқатланиш объектлари, транспорт хизматлари кўрсатувчи ташкилотлар, дам олиш масканлари ва маданий муассасалар вакиллари қатнашди.
Мулоқот давомида вилоятда 2025 йилда туризм соҳасида амалга оширилган лойиҳалар, эришилган натижалар ҳамда соҳанинг ҳозирги ҳолати юзасидан маълумот берилди. Шунингдек, 2026–2027 йилларга мўлжалланган устувор йўналишлар — туризм инфратузилмасини ривожлантириш, янги туризм маҳсулотлари ва йўналишларини яратиш, сайёҳлар оқимини ошириш ҳамда хусусий тадбиркорликни қўллаб-қувватлаш масалалари муҳокама қилинди.
Ташриф давомида Туризм қўмитаси раиси ҳудудда амалга оширилаётган инвестиция лойиҳалари, янги туризм йўналишлари ҳамда хизматлар сифатини оширишга қаратилган ишлар билан ҳам танишди.
Вилоят ҳокими ўринбосари Х. Ахмедов ҳудудда замонавий меҳмонхоналар ва дам олиш масканлари барпо этилаётгани, шунингдек зиёрат туризмини ривожлантириш бўйича олиб борилаётган чора-тадбирлар ҳақида маълумот берди.
Учрашув якунида тадбиркорлар томонидан билдирилган таклиф ва ташаббуслар асосида вилоятда туризмни ривожлантиришга қаратилган истиқболли лойиҳалар бўйича манзилли режа шакллантирилди. Мутасаддиларга мавжуд муаммоларни ўрганиш ва уларни бартараф этиш юзасидан тегишли тавсиялар берилди.
Мутахассислар фикрича, мазкур ташаббусларнинг амалга оширилиши вилоятнинг туристик жозибадорлигини ошириш, янги иш ўринлари яратиш ҳамда ҳудуд иқтисодий фаоллигини кучайтиришга хизмат қилади.
