Кармана ҳокими ўқитувчиларни мажбурий йиғиб, бир соат турғизиб қўйди

Кармана тумани ҳокимлиги биносида 9-мактаб ўқитувчилари иштирокида ўтказилган йиғилиш ҳақидаги ижтимоий тармоқлардаги хабарлар Мактабгача ва мактаб таълими вазирлиги томонидан ўрганилаётгани маълум қилинди.

 

Kun.uz нашрининг ёзишича тумандаги 9-мактабга борган ҳоким Шоҳрух Болтаев ўқувчилардан шеър айтишни ва турли саволларга жавоб беришни сўраган. Ўқувчилар жавоб бера олмаган, бундан ғазабланган ҳоким мактабнинг барча ўқитувчиларини автобусга солиб, туман ҳокимлигига олиб келган. Йиғилиш давомида ўқитувчилар қарийб бир соат тик турган.

 

Ҳоким мажбурий йиғилиш битирувчиларнинг олий таълим муассасаларига кириш кўрсаткичлари пастлиги сабабли ўтказилганини билдирган. У шунингдек, таълим сифатини оширишга ҳаракат қилаётганини таъкидлаган.

 

Вазирлик маълумотларига кўра, 2025 йилда Кармана туманидаги 9-мактаб битирувчиларининг 61 фоизи олий таълим муассасаларига қабул қилинган (туман миқёсида 6-ўрин), ўртача балл кўрсаткичи эса 98,7. Шу билан бирга, 39 нафар битирувчилардан 38 нафари миллий ва халқаро сертификатларга эга.

 

Хабарда қайд этилишича, “Педагогнинг мақоми тўғрисида”ги қонунга мувофиқ, педагогларнинг ҳуқуқлари, шаъни ва касбий обрўси давлат ҳимоясида, касбий фаолиятига аралашиш ва касбий фаолият билан боғлиқ бўлмаган ишларга жалб қилиш қатъиян тақиқланади.

 

Шунингдек, Мактабгача ва мактаб таълими вазирлиги педагогларнинг қонуний ҳуқуқлари ва манфаатларини ҳимоя қилиш, касбий мавқе ва обрўни сақлаш ҳамда мансабдор шахсларнинг педагоглар фаолиятига аралашишини қаттиқ қоралашини маълум қилди.