Сурхондарёда эркак мавжуд бўлмаган Cobalt автомобилини 14 кишига сотди
У харидорлардан янги шиналар қўйиш учун олдиндан тўлов қилишни сўраган. Пулларни олгач, ёзишмаларни ўчириб юборган.
Сурхондарёда 27 ёшли йигит сохта Telegram профили орқали мавжуд бўлмаган Cobalt автомобилини сотиб, 14 кишидан пул олгани аниқланди. Бу ҳақда Сурхондарё ИИБ хабар берди.
Қумқўрғон туманида яшовчи йигит Тelegram'да сохта профиль очиб, турли гуруҳларда Cobalt автомобили сотилади деган эълонлар жойлаштирган. Машинани бозор баҳосидан паст кўрсатиб, харидорларни жалб қилган. У харидорлардан машинага янги шиналар қўйиш учун олдиндан тўлов олишни сўраган ва пулларни олгач, ёзишмаларни ўчириб юборган.
Тергов давомида, гумонланувчи вилоятнинг Олтинсой туманидаги 3 нафар фуқарога жами 8 миллион сўмдан ортиқ зарар етказгани аниқланган. Умумий ҳисобда у 15 нафар фуқаронинг маблағларини ўзлаштирган.
Ҳозирда унга нисбатан Жиноят кодексининг 168-моддаси 3-қисми (фирибгарлик) бўйича жиноят иши қўзғатилган ва қамоққа олиш эҳтиёт чоралари қўлланган.
