Тошкент аэропортида тиллани ички аъзоларига яширган йўловчилар ушланди
Улар шу тариқа 410 грамм заргарлик буюмларини Истанбулга олиб чиқиб кетишга уринган.
Тошкент халқаро аэропортида Истанбулга учмоқчи бўлган икки аёл 410 грамм оғирликдаги олтин тақинчоқларни танасига яшириб олиб чиқишга уринган вақтида фош этилди. Бу ҳақда Божхона қўмитаси хабар берди.
Маълум қилинишича, аёллардан бири 252 грамм, иккинчиси эса 158 грамм оғирликдаги олтин тақинчоқларни жинсий аъзосига яширган ҳолда мамлакатдан олиб чиқишга уринган.
Бундан ташқари, уларнинг қўл сумкаларида божхона назоратига тақдим этилмаган яна 64 грамм заргарлик буюмлари ҳам борлиги маълум бўлган.
Дастлабки ҳисоб-китобларга кўра, аниқланган заргарлик буюмларининг умумий қиймати қарийб 720 миллион сўмни ташкил этган.
Шунингдек, йўловчилар заргарлик буюмлари ўзларига тегишли эмаслиги ҳақида маълум қилишган.
“У ҳолда салкам 60 минг АҚШ доллари қийматидаги заргарлик буюмларининг ҳақиқий эгалари олдидаги қарзни энди қандай узишади? Гувоҳи бўлганингиздек, бир муаммо, бошқасини етаклаб келаверади?”, дейилади қўмита хабарида.
