Тошкент ва Фарғонада 8 килограммга яқин гашишнинг тарқалиши тўхтатиб қолинди
Сирдарёдан ноқонуний сузиб ўтган шахс ва яна бир неча фуқаро қўлга олинди.
Тошкент ва Фарғона вилоятларида ўтказилган тезкор тадбирлар давомида наркотик моддалар тарқалишининг олди олинди. Бу ҳақда ДХХ Zamon.uz'га маълум қилди.
Маълум қилинишича, Тожикистондан Сирдарё дарёси орқали давлат чегарасини ноқонуний кесиб ўтган Бекободда яшовчи фуқаронинг ёнидан 5 кг 31 грамм гашиш моддаси аниқланиб, процессуал тартибда расмийлаштириб олинган.
Яна бир ҳолатда ДХХнинг Тошкент вилояти бўйича бошқармаси ва божхона органлари ҳамкорлигида пойтахтдаги хусусий тиббиёт клиникаларидан бирида текширув ўтказилди. Ҳолислар иштирокида кўздан кечирилган хонада даволанаётган шахсга тегишли 1 кг 367 грамм гашиш моддаси борлиги маълум бўлди.
Шунингдек, тезкор тадбирлар давомида Фарғона туманида яшовчи, 1998 йилда туғилган шахс қўлга олинди. У жиноий шериги томонидан яширин жойга қолдириб кетилган 1 кг 21 грамм гашишни олаётган вақтида ушланган. Унинг яшаш хонадонидан яна 2 грамм опий ҳам ашёвий далил сифатида олинган. Тезкор чоралар натижасида мазкур иш бўйича унинг шериги — Фарғона шаҳрида яшовчи яна бир фуқаро ҳам қўлга олинган.
Яна бир тезкор тадбирда Фарғона вилоятининг Қўштепа туманида яшовчи фуқаро Nexia русумли автомобилида Марғилон ҳудудида ҳаракатланаётганда машинадан 996 грамм гашишни улоқтириб, воқеа жойидан қочишга уринганда ушланган.
Мазкур ҳолатлар юзасидан гумонланувчиларга нисбатан жиноят ишлари қўзғатилиб, уларга “қамоқ” эҳтиёт чораси қўлланилди. Ҳозирда тергов ҳаракатлари давом этмоқда.
