Тошкентда гаровга қўйилган Chery хатланди
Маълум бўлишича, фуқаронинг банкдан 380 млн қарзи бўлган.
Бюронинг Тошкент шаҳар бошқармаси Алоҳида муҳим ишларини ижро этиш шўъбаси иш юритувида Фуқаролик ишлари бўйича Ўртачирчиқ туманлараро судининг 2025 йил 5 ноябрдаги ижро варақасига асосан ижро иши юритилмоқда.
Суд ҳужжатига мувофиқ, қарздор С.Ю.дан ундирувчи банк фойдасига 380 467 625 сўм миқдоридаги кредит қарздорлигини ундириш белгиланган. Шунингдек, кредит мажбуриятларини таъминлаш мақсадида гаров сифатида расмийлаштирилган мол-мулкка ундирув қаратиш назарда тутилган.
Ижро ҳаракатлари давомида давлат ижрочиси томонидан қарздорга тегишли бўлган 2024 йилда ишлаб чиқарилган "Chery Aiqar EQ7" русумли автомашина аниқланиб, амалдаги қонунчилик талабларига мувофиқ хатлов қилинди.
Қарздорга қарздорликни ихтиёрий равишда бартараф этиш учун белгиланган муддат берилди ҳамда бу ҳақда тегишли тартибда огоҳлантирилди. Бироқ, берилган имкониятларга қарамасдан, қарздор томонидан банк олдидаги кредит мажбуриятлари бажарилмади.
Шундан сўнг ижро ҳужжати талабларини таъминлаш мақсадида мажбурий ижро чоралари қўлланилиб, хатланган автомашина белгиланган тартибда аукцион савдоларига чиқарилди.
Қонунчилик талабларига мувофиқ, аукцион савдоларидан тушган пул маблағлари биринчи навбатда ундирувчи банкнинг қарздорлик суммасини қоплашга йўналтирилади.
Кредит мажбуриятларини ўз вақтида бажариш ҳар бир фуқаронинг молиявий интизомини намоён этади. Акс ҳолда, кредит таъминоти сифатида гаровга қўйилган мол-мулк қонун доирасида реализация қилиниши мумкин.
