Трамп Путиннинг Эрон уранини Россияга кўчириш таклифини рад этди
Мазкур таклиф АҚШ-Исроил ва Эрон урушини якунлаш бўйича келишувнинг бир қисми сифатида кўрилган.
Axios нашри хабарига кўра, Россия Президенти Владимир Путин Қўшма Штатлар Президенти Доналд Трамп билан телефон орқали суҳбатда Эроннинг бойитилган уран захирасини Россияга олиб чиқиш ғоясини илгари сурган. Бу таклиф АҚШ ва Эрон ўртасидаги урушни тугатиш бўйича келишувнинг бир қисми сифатида кўрилган.
Манбаларга кўра, Трамп ушбу таклифни рад этган. Чунки АҚШ ва Исроил учун урушдаги асосий мақсадлардан бири Эроннинг 60 фоизгача бойитилган 450 килограмм уранини назоратга олиш ҳисобланади. Мутахассислар бу миқдор қисқа вақт ичида қурол яратишга етарли эканини айтмоқда.
Россия аввал ҳам Эроннинг паст даражада бойитилган уранини 2015-йилги ядро келишуви доирасида сақлаган ва уранни қабул қилиш имкониятига эга давлатлардан бири ҳисобланади.
Шунингдек, АҚШ мудофаа вазири Пит Ҳегсет Вашингтон Эроннинг юқори даражада бойитилган уранини назоратга олиш бўйича бир нечта вариантларни кўриб чиқаётганини маълум қилди.
Унинг сўзларига кўра, вариантлардан бири Теҳроннинг уран захирасини ихтиёрий равишда топширишидир.
АҚШ президенти эса ҳозирча бойитилган уранни қўлга олиш устувор вазифа эмаслигини, бироқ бу масала кейинчалик кўриб чиқилиши мумкинлигини айтган.
