АҚШ фуқаролигидан чиқиш тўлови 80 фоизга камайтирилди
Тўлов 2015 йилда аризалар сонининг кескин ошиши сабаб 2350 долларгача кўтарилган эди.
АҚШ Давлат департаменти қарорига кўра, фуқароликдан расман воз кечиш учун ундириладиган консуллик тўлови қарийб 80 фоизга камайтирилди. Бу ҳақда Newsmax ва Associated Press хабар берди.
Янги тартибга мувофиқ, фуқароликдан чиқиш учун барча ҳужжатларни расмийлаштириш қиймати 450 доллар этиб белгиланди. Мазкур ўзгариш жума кунидан кучга кирган.
Эслатиб ўтилишича, ушбу тўлов 2015 йилда кескин оширилган эди. Ўша пайтда фуқароликдан воз кечиш учун тўлов 450 доллардан 2350 долларгача кўтарилган. Бу қарор чет элда яшаётган америкаликларнинг аризалари кескин кўпайгани ҳамда консуллик хизматлари харажатларини қоплаш зарурати билан изоҳланган.
Мутахассисларнинг таъкидлашича, аризалар сонининг ортишига чет элда яшовчи АҚШ фуқаролари учун солиқ ҳисоботлари бўйича янги талаблар жорий этилгани сабаб бўлган.
Тўловнинг юқорилиги кўплаб америкалик муҳожирлар ва жамоат ташкилотлари томонидан танқид қилинган. Хусусан, Францияда жойлашган Association of Accidental Americans ташкилоти ушбу тўловни конституцияга зид деб ҳисоблаб, судга мурожаат қилган.
Ташкилот президенти Фабиен Леҳагре бу қарорни «фуқароликдан воз кечиш ҳуқуқини барча учун очиқ қилиш йўлидаги муҳим ғалаба» деб баҳолаган.
Ташкилот маълумотларига кўра, 2023 йилда тўлов камайтирилганидан сўнг қарийб 9 минг киши АҚШ фуқаролигидан воз кечган.
