Чилонзорда наркокурьерларни қўлга олган инспекторга муддатидан олдин майор унвони берилди
Инспектор томонидан қўлга олинган шахсдан 295 дона прегабалин капсуласи топилган.
Тошкентнинг Чилонзор тумани ҳудудида наркотик воситалар тарқатиш билан шуғулланган шахсларни қўлга олишда фаол иштирок этган профилактика инспектори, капитан Лазиз Абдукаримовга хизматдаги жасорати учун муддатидан олдин майор унвони берилди. Бу ҳақда Ўзбекистон Республикаси ИИВ Жамоат хавфсизлиги департаменти хабар берди.
Маълум қилинишича, ҳодиса «Хавфсиз ва соғлом юрт» ойлиги ҳамда ҳудудларда хавфсиз муҳитни таъминлашга қаратилган тезкор-профилактик тадбирлар доирасида содир бўлган. 13 март куни Хирмонтеpa маҳалласи профилактика инспектори хизмат вазифасини бажариш жараёнида кўчада шубҳали ҳаракатланаётган икки нафар шахсни текшириш мақсадида тўхтатган.
Бироқ гумонланувчилар ходимнинг қонуний талабига бўйсунмай қочишга уринган. Профилактика инспектори улардан бирини қувиб етиб, қўлга олган. Холислар иштирокида ўтказилган текширув давомида гумонланувчининг ёнидаги сумкадан 59 та zip-пакетга қадоқланган 295 дона прегабалин туридаги кучли таъсир қилувчи дори воситалари аниқланган.
Тезкор суриштирув давомида қўлга олинган шахс маҳалла ҳудудидаги бир нечта жойларга яшириб қўйган ҳамда геолокация орқали белгилаб кетган дори воситалари ҳам топилиб, ашёвий далил сифатида расмийлаштирилган.
Кейинчалик жиноят қидирув бўлими ходимлари томонидан олиб борилган тезкор тадбирлар натижасида гумонланувчининг қочиб кетган шериги Шайхонтоҳур тумани ҳудудида қўлга олинган. Унинг ёнидан ҳам тарқатиш учун тайёрланган 35 дона кучли таъсир қилувчи капсула аниқланган.
Профилактика инспектори Лазиз Абдукаримовнинг хизмат вазифасини сидқидилдан бажаргани ҳамда мураккаб вазиятда қатъият билан ҳаракат қилгани инобатга олиниб, Ўзбекистон Республикаси Ички ишлар вазирлиги буйруғи билан унга муддатидан олдин майор унвони берилган.
