Тошкент йўлларида кенг кўламли таъмирлаш ишлари олиб борилмоқда

«Долзарб 90 кун» дастури доирасида пойтахт кўчаларини модернизация қилиш ишлари якуний босқичга кирмоқда.

 

Душанба кунидан бошлаб кутилаётган қуруқ ва илиқ об-ҳаво шароити бошланган ишларни якунлаш ҳамда янги, юқори сифатли асфальт қопламасини ётқизиш учун қулай имконият яратади.

 

Сўнгги кунларда шаҳарнинг айрим кўчаларида фрезалаш ишлари олиб борилаётгани кузатилмоқда.

 

Мазкур жараён йўл таъмирининг муҳим тайёргарлик босқичи бўлиб, унда махсус техника ёрдамида эскирган ва яроқсиз ҳолга келган асфальт қатлами қириб олинади.

Бу эса янги асфальт қопламасининг текис ва сифатли ётқизилишини таъминлайди, йўл қопламасининг тез бузилишига олиб келувчи омилларнинг олдини олади ҳамда ҳаракат хавфсизлиги ва йўлларнинг узоқ муддат хизмат қилишига замин яратади.

 

Йўлнинг юқори қатлами вақтинча олиб ташлангани ҳайдовчилар учун маълум ноқулайликлар туғдириши мумкин. Шунга қарамай, ушбу ишлар йўл сифатини яхшилаш ва ҳаракат хавфсизлигини оширишга қаратилган.

 

Йўл ҳаракатини ташкил этиш маркази ҳайдовчилардан эҳтиёткор бўлишни, вақтинчалик йўл белгиларга амал қилишни сўраб, пойтахт йўлларида ҳаракатни қулай ва хавфсиз ташкил этиш бўйича ишлар давом этаётганини маълум қилди.