Эрон АҚШ билан урушни тугатиш шартларини эълон қилди
АҚШ эса можарони Эрон тўлиқ таслим бўлмагунча якунлаш ниятида эмаслигини маълум қилган.
Эрон АҚШ билан урушни тугатиш бўйича ўз шартларини эълон қилди. Теҳрон можарони якунлаш масаласини фақат маълум талаблар бажарилганидан кейин муҳокама қилишга тайёрлигини билдирган.
Эрон расмийларига кўра, мамлакат АҚШ билан давом этаётган можарони тугатиш учун икки асосий шартни илгари сурган. Бу ҳақда Эрон сиёсий арбоби, Мақсадга мувофиқликни аниқлаш кенгаши аъзоси Моҳсен Ризоий маълум қилган.
Унинг таъкидлашича, биринчи шарт — АҚШ томонидан уруш давомида етказилган зарар учун тўлиқ компенсация тўланиши.
Иккинчи шарт эса Америка ҳарбий кучларининг Форс кўрфази ҳудудидан тўлиқ олиб чиқилиши ҳисобланади.
Ризоийнинг сўзларига кўра, Теҳрон урушни тугатиш масаласини фақат ушбу талаблар бажарилганидан сўнг муҳокама қилишга тайёр.
Аввалроқ Эроннинг олий раҳбари лавозимини эгаллаган Можтаба Хоманаий ҳам Яқин Шарқ давлатларини ўз ҳудудларида жойлашган АҚШ ҳарбий базаларини ёпишга чақирган ва уруш оқибатида етказилган зарар учун компенсация талаб қилган эди.
Шу билан бирга, Дональд Трамп бошчилигидаги АҚШ маъмурияти можарони бошқа нуқтаи назардан баҳоламоқда. Вашингтон Теҳрон билан келишув фақат Эрон тўлиқ таслим бўлган тақдирдагина амалга ошиши мумкинлигини билдирган.
