Исроилнинг ҳаво ҳужумига қарши ракета захираси камаймоқда
Мутахассислар захиралар 2025-йилдаги 12 кунлик Эрон–Исроил уруши вақтида қисман сарфланганини таъкидламоқда.
Semafor нашри хабар беришича, Исроил расмийлари АҚШга Эрон билан эҳтимолий уруш шароитида баллистик ракеталарни тутиб қолувчи тизимлар захираси камайиб бораётганини маълум қилган.
Манбаларга кўра, можаро бошланиши арафасидаёқ Исроилнинг бундай воситалар захираси чекланган бўлган. Бунга 2025 йилда юз берган 12 кунлик Эрон–Исроил уруши давомида тутиб қолувчи ракеталар қисман сарфлангани сабаб бўлган.
Шунингдек, CNN маълумотларига кўра, Эрон ракеталарга кассетали ўқ-дорилар қўшишни бошлагани Исроил мудофаа тизимларига тушаётган юкламани янада ошириши мумкин.
АҚШ расмийлари Исроилнинг бу муаммосидан бир неча ойдан бери хабардор эканини билдирган. Америкалик амалдорлардан бири бу ҳолат кутилганини таъкидлаб, Вашингтонда бундай тутқичлар тақчиллиги кузатилмаётганини қайд этган.
Хабарда айтилишича, Исроил зарур бўлса қирувчи самолётлардан ҳам фойдаланиши мумкин, бироқ узоқ масофали ракеталарга қарши курашишда тутиб қолувчи ракеталар энг самарали восита ҳисобланади.
Маълумотларга кўра, 2025 йил июн ойида АҚШ Эрон билан 12 кунлик уруш давомида 150 дан ортиқ THAAD тутқичларини жойлаштирган бўлиб, бу ўша пайтдаги АҚШ захирасининг қарийб чорак қисмини ташкил этган. Шунингдек, урушнинг дастлабки беш кунида қиймати қарийб 2,4 миллиард доллар бўлган Patriot ракета тутқичлари ҳам ишга туширилгани маълум қилинган.
Оқ уй матбуот котиби Каролин Левиттнинг таъкидлашича, АҚШ захиралари Дональд Трамп маъмуриятининг Эрон бўйича стратегик мақсадларини амалга ошириш учун «етарли даражадан ҳам ортиқ».
Шу билан бирга, Reuters манбаларига кўра, Яқин Шарқ давлатлари урушни тўхтатиш бўйича музокараларни бошлашга уринаётган бўлса-да, Вашингтон ҳозирча бундай ташаббусларга қизиқиш билдирмаган. Музокаралар учун воситачилик қилишга ҳаракат қилаётган давлатлардан бири сифатида Уммон тилга олинмоқда.
