Мужтабо Хоманаий даволаниш учун Москвага олиб кетилган
У 28 февраль куни Эронга қилинган ҳаво ҳужумлари вақтида жароҳат олган.
Эроннинг янги Олий раҳбари Мужтабо Хоманаий соғлиғи билан боғлиқ муаммолар сабаб Россия пойтахти Москвага яширин тарзда олиб кетилгани ҳақида хабарлар тарқалди. Бу ҳақда Al-Jarida нашри раҳбариятга яқин манбага таяниб маълум қилган.
Нашр маълумотларига кўра, Хоманаий Россия ҳарбий самолёти орқали Москвага олиб келинган ва у ерда жарроҳлик амалиётини бошдан кечирган.
Ҳозирда у Россия президенти қароргоҳларидан бири ҳузуридаги хусусий клиникалардан бирида даволанаётгани айтилмоқда.
Манбанинг билдиришича, Мужтабо Хоманаий 28 февраль куни Эронга қилинган дастлабки ҳаво ҳужумлари вақтида жароҳат олган. Давом этаётган ҳужумлар сабаб мамлакат ичида даволаниш жараёни мураккаблашгани боис уни Москвага олиб бориш тўғрисида қарор қабул қилинган.
Хабарга кўра, Владимир Путин аввалроқ Масъуд Пезешкиан билан телефон орқали мулоқот чоғида Хоманаийнинг Россияда даволанишини ташкил этишни таклиф қилган. Эрон расмийлари ушбу таклифни кўриб чиқиб, уни маъқуллаган.
