Тошкентда Lacetti ва Matiz тўқнашуви оқибатида бир киши ҳалок бўлди
Ҳолат юзасидан жиноят иши қўзғатилиб, тергов олиб борилмоқда.
Тошкент шаҳрида содир бўлган йўл-транспорт ҳодисаси оқибатида бир киши вафот этди. Бу ҳақда Тошкент шаҳар ИИББ Йўл ҳаракати хавфсизлиги хизмати хабар берди.
Маълум қилинишича, 15 март куни тахминан соат 05:00 ларда Олмазор тумани ҳудудидаги Себзор–Нурафшон кўчалари чорраҳасида Chevrolet Lacetti ҳамда Daewoo Matiz русумли автомобиллар ўртасида тўқнашув содир бўлган.
Йўл-транспорт ҳодисаси оқибатида Matiz автомобили ҳайдовчиси оғир тан жароҳатлари билан шифохонага олиб борилган. Шифокорларнинг кўрсатган ёрдамига қарамай, у шифохонада вафот этган.
Мазкур ҳолат юзасидан Тошкент шаҳар ИИББ Тергов бошқармаси томонидан Ўзбекистон Республикаси Жиноят кодексининг 266-моддаси 2-қисми билан жиноят иши қўзғатилиб, ҳозирда дастлабки тергов ҳаракатлари олиб борилмоқда.
