Олмалиқда 3-мис бойитиш фабрикаси ишга туширилиши доирасида 6 мингдан ортиқ иш ўринлари яратилади
Президент Шавкат Мирзиёев иштирокида Олмалиқ кон-металлургия комбинатида 3-мис бойитиш фабрикасини ишга тушириш маросими бошланди.
Шавкат Мирзиёев Олмалиқ конь-металлургия комбинатида 3-мис бойитиш фабрикасини ишга тушириш маросимида мажмуа тўлиқ ишга туширилгач, 6 мингдан ортиқ ёшлар юқори даромадли иш ўринлари билан таъминланишини маълум қилди.
Маълумотларга кўра, 3-мис бойитиш фабрикаси тўлиқ ишга туширилгач, Олмалиқ кон-металлургия комбинатида мис концентратининг кунлик ишлаб чиқариш ҳажми ҳозирги 2 минг 400 тоннадан 5 минг тоннагача ошади.
Маросимда мазкур лойиҳа шунчаки корхона эмас, балки мамлакат саноат қудратини янада мустаҳкамлайдиган, табиий бойликларни чуқур қайта ишлашга хизмат қиладиган замонавий индустриал мажмуа экани таъкидланди.
Қайд этилишича, “Ёшлик-1” ва “Қалмоққир” конларида жами 45 миллион тонна мис ҳамда 5 минг тоннадан ортиқ олтин захираси мавжуд бўлиб, ушбу захиралар мамлакат саноатини камида 100 йил давомида хомашё билан таъминлайдиган кафолатли база ҳисобланади.
Шунингдек, конларда мавжуд молибден, селен, теллур ва рений каби ноёб металлар янги инновацион йўналишлардаги лойиҳаларни ривожлантириш учун муҳим асос бўлиб хизмат қилиши айтилди.
Бундан ташқари, фабрикада АҚШ, Германия, Россия, Хитой ва Финляндиянинг тоғ-конь саноатидаги илғор технологиялари жорий этилмоқда. Барча технологик жараёнлар рақамлаштирилиб, сунъий интеллект асосида ягона бошқарув тизимига уланади.
Мутахассислар ушбу тизимлар жорий этилиши натижасида энергия сарфи 10 фоизга, маҳсулот таннархи 15 фоизга камайиб, меҳнат унумдорлиги эса 10 фоизга ошишини билдирди.
