Андижонда 5 киши аёлни самосуд қилиб, сочини олиб ташлади
Самосуд қилган шахслар қўлга олиниб, жиноят иши қўзғатилди
Андижон вилоятида бир аёлни мажбуран автомобилга ўтказиб, овлоқ жойга олиб бориб сочини олиб ташлаган беш нафар шахсга нисбатан жиноят иши қўзғатилди. Бу ҳақда Андижон вилояти ИИБ маълум қилди.
Дастлабки маълумотларга кўра, 1991 йилда Избоскан туманида туғилган ва ҳозирда Андижон шаҳрида яшовчи аёл 1998 йилда туғилган бошқа бир аёлни турмуш ўртоғи билан ишқий муносабатда бўлганликда айблаб, ундан қасос олишни режалаштирган.
2025 йил 23 декабрь куни у даволаниб ётган шифохонага 1995, 2004 ва 2001 йилларда туғилган таниш аёллари орқали жабрланувчини олиб келган. Шифохонада аёлга нисбатан турли ножўя ҳаракатлар содир этилиб, у таҳқирланган ҳамда бу жараён видеога олинган.
Шундан сўнг гумонланувчи аёл ўзининг танишлари — 1999 ва 1998 йилларда туғилган икки нафар эркакни чақириб, жабрланувчини овлоқ жойга олиб бориб сочларини олиб ташлашни буюрган. Натижада аёл оқ рангли Gentra автомобилига мажбуран ўтказилиб, Андижон тумани Жевачи маҳалласи ҳудудидаги хилват жойга олиб борилган. У ерда 1999 йилда туғилган эркак томонидан унинг сочлари машинка ёрдамида олиб ташланган.
Мазкур жараён 1995 йилда туғилган аёл томонидан видеога олинган ва кейинчалик ижтимоий тармоқларга жойлаштирилган.
Ҳолат юзасидан Андижон шаҳри бўйича Ички ишлар органлари фаолиятини мувофиқлаштириш бошқармаси ҳузуридаги тергов бўлими томонидан Жиноят кодексининг 137-моддаси 2-қисми “в” банди билан жиноят иши қўзғатилган.
Гумонланувчи сифатида беш нафар шахс процессуал тартибда ушланган. Ҳозирда жиноят иши бўйича дастлабки тергов ҳаракатлари олиб борилмоқда. Мазкур иш Андижон вилояти прокуратураси томонидан алоҳида назоратга олинган.
