БАА ҳаво ҳудудининг қисман ёпилиши 23 мартгача узайтирилди
Чекловлар АҚШ–Исроил ва Эрон ўртасидаги ҳарбий кескинлик фонида жорий этилган.
Бирлашган Араб Амирликлари мамлакат ҳаво ҳудудининг қисман ёпилиши муддатини яна бир ҳафтага узайтирди. Бу ҳақда Яқин Шарқдаги ҳаво ҳаракатини бошқариш хизматларидаги манбага таяниб, TASS ахборот агентлиги хабар берди.
Маълум қилинишича, ҳаво ҳудуди 23 март куни маҳаллий вақт билан соат 16:00 га қадар қисман ёпиқ бўлиб қолади.
Қайд этилишича, маҳаллий аэропортларга амалга ошириладиган ҳамда у ердан учиб кетадиган рейслар учун олтита махсус йўналиш белгиланган. Ушбу йўналишлар қўшни Уммон ва Саудия Арабистони ҳаво ҳудуди билан чегарадаги назорат-ўтиш пунктларига олиб боради.
Шунингдек, экипажларга ҳаво ҳаракатини бошқариш марказлари томонидан берилаётган тезкор маълумотларни мунтазам кузатиб бориш бўйича кўрсатма берилган.
Мазкур чекловлар АҚШ ва Исроилнинг Эронга қарши олиб бораётган ҳарбий операциялари ҳамда Теҳроннинг бунга жавобан Яқин Шарқдаги Америка ҳарбий базаларига уюштирилаётган ҳужумлари фонида жорий этилган.
Аввалроқ БАА ҳаво ҳудуди қисман ёпилгани сабабли 16 март куни Тошкентдан Дубайга амалга оширилган айрим рейслар ортга қайтарилгани ҳақида хабар берилганди.
