Бўка туманида солиқ инспектори пора олаётган вақтида ушланди
Солиқ инспектори фермердан пора сифатида 10 миллион сўм талаб қилган.
Тошкент вилоятининг Бўка туманида солиқ органи ходими пора олиш билан боғлиқ жиноятда гумонланиб қўлга олинди. Бу ҳақда ҳуқуқни муҳофаза қилувчи органлар маълум қилди.
Маълум қилинишича, туман солиқ инспекциясининг бош инспектори пахта ва ғалла етиштиришга ихтисослашган фермер хўжалиги раҳбарининг ишончига кириб, хўжаликнинг солиқ органлари олдидаги 165,6 млн сўм миқдоридаги қарздорлигини тўлаш муддатини вилоят солиқ бошқармасидаги танишлари орқали узайтириб беришни ваъда қилган. Бунинг эвазига у фермердан 10 млн сўм талаб қилган.
Давлат хавфсизлик хизмати ҳамда Бош прокуратура ҳузуридаги Департамент ходимлари ҳамкорлигида ўтказилган тезкор тадбирда бош инспектор сўралган пулни хизмат хонасида олаётган вақтида ашёвий далиллар билан ушланди.
Ҳолат юзасидан унга нисбатан Жиноят кодексининг 168-моддаси 3-қисми “в” банди ҳамда 28,211-моддаси 1-қисми билан жиноят иши қўзғатилиб, “қамоқ” эҳтиёт чораси қўлланган. Ҳозирда тергов ҳаракатлари давом этмоқда.
Шунингдек, фуқаролар бундай қонунбузилиш ҳолатларига дуч келса, Давлат хавфсизлик хизматининг 1520 қисқа рақамига мурожаат қилиши мумкинлиги эслатилди. Шахсий маълумотлар сир сақланиши кафолатланади.
