Эрондаги вазият Марказий Осиёда энг кўп Тожикистонга таъсир қилиши мумкин
2025 йилнинг биринчи ярмида Тожикистон Эрондан 600 млн долларлик маҳсулот импорт қилган.
Эрондаги кескин вазият Марказий Осиё мамлакатлари иқтисодиётига турлича таъсир кўрсатиши мумкин. Мутахассислар фикрига кўра, ушбу ҳолатдан энг кўп зарар кўриши эҳтимоли бўлган давлатлардан бири Тожикистон ҳисобланади.
РАНЕПА мутахассиси Анатолий Тихоновнинг таъкидлашича, 2025 йилнинг биринчи ярмида Тожикистон Эрондан қарийб 600 миллион долларлик маҳсулот импорт қилган.
Экспертга кўра, иқтисодий ресурслари чекланган республика учун бу кўрсаткич, айниқса озиқ-овқат хавфсизлиги нуқтаи назаридан муҳим аҳамиятга эга.
Sputnik Tajikistan хабарига кўра, Яқин Шарқдаги можаро минтақада логистика ва суғурта харажатларининг ошишига олиб келиши мумкин. Бу эса Марказий Осиё давлатлари учун ташқи савдо харажатларини кўпайтириши эҳтимолини кучайтиради.
Мутахассислар қайд этишича, Эрон Марказий Осиё мамлакатлари учун океанларга чиқиш имконини берадиган асосий транспорт йўлларидан бири ҳисобланади. Шу сабабли минтақадаги кескинлик савдо ва транзит жараёнларига бевосита таъсир кўрсатиши мумкин.
Таҳлилчиларнинг фикрича, иқтисодий ва транспорт имкониятлари нисбатан чекланганлиги сабабли Тожикистон бундай вазиятга бошқа давлатларга қараганда анча заиф бўлиши мумкин.
