Фарғонада солиқдан қарздор корхоналар бинолари хатланмоқда
Хусусан, Риштонда 1,6 млрд сўм солиқ қарзи учун бино-иншоотлар хатланган.
Бюронинг Риштон туман бўлими томонидан солиқ қарздорлигини ундириш юзасидан навбатдаги мажбурий ижро ҳаракатлари амалга оширилди.
Маълум бўлишича, туманда уруғчилик фаолияти билан шуғулланиб келган хўжалик юритувчи субъект томонидан давлат бюджети олдидаги солиқ мажбуриятлари бажарилмаган. Натижада корхонанинг жами 1 млрд 669 млн 998 минг сўм солиқ қарздорлиги юзага келган.
Мажбурий ижро бюроси Риштон туман бўлими давлат ижрочилари томонидан қарздорликни ундириш мақсадида қонунчиликда белгиланган тартибда мажбурий ижро ҳаракатлари амалга оширилиб, 2026 йил 14 март куни қарздор корхонага тегишли бино ва иншоотлар хатланди.
Хатланган мулклар белгиланган тартибда очиқ аукцион савдоларига чиқарилиши, ундан тушган пул маблағлари эса мавжуд солиқ қарздорлигини қоплашга йўналтирилиши белгиланди.
