ИЖҚКД катта тезкор вакили 85 миллион сўм пора билан қўлга олинди

Жиззах вилоятида Иқтисодий жиноятларга қарши курашиш департаментининг Пахтакор туман бўлими катта тезкор вакили давлат манфаатига қарши жиноят қилганликда айбланиб, қўлга олинди. Бу ҳақда ДХХ Zamon.uz'га маълум қилди.

 

Маълумотларга кўра, ушбу тезкор вакил шахсий бойлик орттириш мақсадида муқаддам судланган таниши билан ҳамкорликда, техника таъминоти билан шуғулланувчи МЧЖ раҳбари ишончини қозонган. Улар Жиззах шаҳар Мактабгача ва мактаб таълими бўлими билан 20 та интерактив доскаларни қиммат нархда сотиб олиш бўйича электрон шартнома тузишда «ғолиблик»ни қўлга киритишга ваъда берган.

 

Тергов ҳаракатлари давомида аниқланишича, катта тезкор вакил интерактив доскаларни ҳақиқий нархи 15,2 млн сўм бўлгани ҳолда, 25 млн сўмдан сотишга ҳаракат қилган. Шу тариқа, улар ўз “хизматлари” учун 85 млн сўм талаб қилган.

 

Давлат хавфсизлик хизмати ходимлари ва прокуратура органлари билан ҳамкорликда ўтказилган тезкор тадбирда тезкор вакилнинг таниши 85 млн сўмни олаётган вақтда ушланган. Кейинроқ, катта тезкор вакил ва мактаб директори ўз яшаш хонадони олдида танишидан 30 млн сўмни олган вақтида ашёвий далиллар билан қўлга олинган.

 

Ҳозирда Жиззах вилояти прокуратураси томонидан жиноят иши қўзғатилиб, ИЖҚКД Пахтакор туман бўлими катта тезкор вакили ҳамда мактаб директорига нисбатан “қамоқ” эҳтиёт чораси қўлланди. 

 

Тергов ҳаракатлари давом этмоқда.