Нетаняҳу тирик экан Исроил доимо кимнидир душман сифатида кўради — Туркия ташқи ишлар вазири
Туркия мамлакатни ҳеч ким Яқин Шарқдаги можарога торта олмаслигини билдирди.
Туркия ташқи ишлар вазири Ҳоқон Фидан Исроил бош вазири Бенжамин Нетаняҳу ҳокимиятда экан, Исроил ҳар доим кимнидир ўзига душман сифатида кўришини айтди. Бу ҳақда The Wall Street Journal хабар бермоқда.
“ Доим душман "пайдо қилиш" унга ўз сиёсатини олға суриш учун керак. Исроил хавфсизлик ортидан эмас, кўпроқ ер эгаллаш ортидан қувмоқда. Нетаняҳу бу ғоядан воз кечмас экан, Яқин Шарқда доимо уруш бўлаверади”, — деди Фидан.
Унинг сўзларига кўра, Исроил минтақада ташқи аралашувлар орқали ўз геосиёсий манфаатларини амалга оширмоқда. Фидан Исроил ҳукумати Ғазодаги сулҳ келишувини бузишда давом этаётганини ва у ердаги гуманитар вазият кун саин ёмонлашаётганини қайд этди.
Шунингдек, Фидан Нетаняҳу “Ҳизбуллоҳ”га қарши кураш баҳонаси билан Ливанда янги қирғин содир этиши мумкинлигидан хавотирда эканини билдирди. У халқаро ҳамжамиятни Исроил томонидан содир этилаётган жиноятларга қарши зудлик билан чора кўришга чақирди.
Ҳоқон Фиданнинг таъкидлашича, Туркия давом этаётган адолатсиз урушда иштирок этишни истамайди ва мамлакатни можарога жалб қилишга бўлган ҳар қандай уринишларга қатъий қарши. Анқара провокацияларга берилмасликка қарор қилганини ва мамлакатнинг ҳарбий ҳамда тийиб туриш салоҳияти жуда юқори эканини билдирди.
“Туркия стратегик жиҳатдан кучини қачон ва қаерда ишлатишни яхши билади. Бироқ урушни имкони борича тезроқ дипломатик йўл билан ҳал қилиш зарур. Эронга қилинган ҳужумлар дарҳол тўхтатилиши керак, шунингдек, Эроннинг қўшни давлатларга ҳужумлари ҳам тўхташи лозим. Шу билан бирга, томонлар тез орада музокараларга қайтиши керак”, — дея фикр билдирди Туркия ТИВ раҳбари.
