Олтин қазиб олиш ҳажми 118,4 тоннага етказилди

Сўнгги йилларда Ўзбекистонда тоғ-конь саноати тубдан ислоҳ қилиниб, соҳада инвестициялар ҳажми ва ишлаб чиқариш кўрсаткичлари сезиларли даражада ошган. Бу ҳақда Шавкат Мирзиёев Олмалиқдаги 3-мис фабрикасининг очилиш маросимида маълум қилди.

 

Қайд этилишича, аввал қимматбаҳо ва рангли металларни қазиб олиш билан атиги икки комбинат шуғулланган. Конларни инвесторларга бериш бўйича шаффоф тизим яратилгани натижасида эса сўнгги тўққиз йил ичида соҳага 10 миллиард доллар хорижий инвестиция жалб этилган. Ҳозирда тармоқда 65 та хусусий корхона фаолият юритмоқда.

 

Mаълумотларга кўра, мустақилликнинг дастлабки 25 йилида олтин қазиб олиш ҳажми 63 тоннадан 87 тоннагача, яъни 24 тоннага ошган. Сўнгги тўққиз йил ичида эса бу кўрсаткич яна 31 тоннага кўпайиб, ўтган йили 118,4 тоннага етказилган.

 

Шунингдек, 2016 йилдан буён кумуш ишлаб чиқариш 1,6 баробар, уран 2,1 баробар, мис эса 1,4 баробар ошган. Натижада соҳада ишлаб чиқариш ҳажми 1,7 баробар ўсиб, ўтган йил якунига кўра 270 триллион сўмга етган.

 

Таъкидланишича, энг юқори даромадли иш ўринлари ҳам айнан шу тармоқ корхоналарида шаклланган. Бугунги кунда экскаватор машинистлари 30 миллион сўмгача, бурғилаш мутахассислари ва йирик самосвал ҳайдовчилари 40 миллион сўмгача, геолог ҳамда маркшейдерлар эса 70 миллион сўмгача ойлик маош олмоқда.