Қорақалпоғистонда “Ўзйўлкўприк” ходими пора билан қўлга олинди
Ходим “Беруний-Тўрткўл” магистраль йўл қурилиши лойиҳасининг бир қисмини олиб бериш учун тадбиркордан 10 минг доллар талаб қилган.
Қорақалпоғистон Республикасида йўл қурилиши соҳасида давлат мансабдори томонидан ноқонуний ҳаракатлар содир этилгани аниқланди. Бу ҳақда ДХХ Zamon.uz'га маълум қилди.
Маълум қилинишича, “Ўзйўлкўприк” кластери давлат муассасаси Қорақалпоғистон филиали ходими хизмат мавқеидан фойдаланиб, “Беруний-Тўрткўл” А380-сонли магистраль йўл қурилиши лойиҳасининг 5 километрлик иш ҳажмини олиб бериш эвазига қурилиш фаолияти билан шуғулланувчи МЧЖ раҳбаридан 10 минг АҚШ доллари талаб қилган.
Давлат хавфсизлик хизмати Қорақалпоғистон бошқармаси ходимлари ўтказган тезкор тадбирда ушбу мансабдор шахс талаб қилган пулни олаётган вақтида ушлаб, унинг ноқонуний ҳаракатларига чек қўйилган.
Ҳозирда унга нисбатан Ўзбекистон Жиноят кодексининг 168-моддаси 3-қисми “в” банди ва 28, 211-моддаси 1-қисми билан жиноят иши қўзғатилган ҳамда тергов ҳаракатлари олиб борилмоқда.
