Рим папаси Эрон билан уруш Худо томонидан қўллаб-қувватланаётгани ҳақидаги фикрларни танқид қилди
Шунингдек, у томонларни ўт очишни тўхтатиб, минтақадаги зўравонликка барҳам беришга чақирди.
Рим папаси Лео якшанба куни кенгайиб бораётган Эрон урушида дарҳол ўт очишни тўхтатишга чақирди ва уруш чидаб бўлмас зўравонликка сабаб бўлаётганини таъкидлади. Бу ҳақда Reuters хабар берди.
Папа минглаб тинч аҳоли ҳалок бўлаётгани ва минтақа аҳолиси азоб-уқубатлар ичида қолганини ҳам қайд этган.
Авлиё Питер майдонидаги ҳафталик Ангелус дуо маросимида Рим папаси: “Яқин Шарқ халқлари икки ҳафтадан бери урушнинг беаёв зўравонликларидан азоб чекмоқда. Масъул шахсларга мурожаат қиламан: дарҳол ўт очишни тўхтатинг!” — деди.
Папа Лео шунингдек, Ливан вазиятидан ҳам хавотир билдириб, уруш муаммоларни ҳал қилмаслигини, аксинча тинчлик учун доимий музокара зарурлигини айтди.
“Баъзилар ўзгаларни ўлдириш қарорларини оқлаш учун Худонинг номидан фойдаланяпти, аммо Худо зулмат хизматига ёлланмайди. У ҳар доим инсониятга ёруғлик, умид ва тинчлик олиб келади,” — деди папа.
Мазкур баёнот АҚШ аскарларига уруш “Худонинг илоҳий режасининг бир қисми” сифатида айтилаётгани ҳақида шикоятлар пайдо бўлганидан сўнг берилди.
