Россияда Телеграмни блоклаш бошланди
Россиянинг турли ҳудудларидан мессенжернинг ишламаётгани юзасидан шикоятлар келиб тушган.
16 март куни эрталаб Россиядаги Telegram фойдаланувчилари мессенжер ишлашида муаммолар юзага келганини билдиришди. Бу ҳақда Коммерсант хабар бермоқда.
“Сбой рф” маълумотларига кўра, Москва вақти билан соат 11:00 ҳолатига кун бошидан буён Telegram фаолиятида юзага келган носозликлар юзасида 2,5 мингдан ортиқ шикоят келиб тушган.
Detector404 хизмати эса бир сутка давомида 8 мингдан ортиқ носозликлар ҳақида хабар қайд этган.
“Фойдаланувчиларнинг энг кўп билдирган муаммолари шуки, мессенжернинг ҳеч бир версияси — web, десктоп ёки мобил — ишламаяпти. Шикоятларнинг ярмидан кўпи Москва ва атроф ҳудудлардан келган. Шунингдек, Санкт-Петербург ва Марказий Россиянинг бошқа ҳудудларидан ҳам носозликлар ҳақида хабарлар тушган”, дейилади хабарда.
Ўтган ҳафта Давлат Думаси ВПН хизматлари Россияда ярим йил ичида блокланиши мумкинлигини билдирган эди. Ахборот сиёсати қўмитаси раиси ўринбосари Андрей Свинтсовнинг сўзларига кўра, Роскомнадзорда бундай хизматлар трафигини назорат қилишнинг техник имконияти мавжуд, махсус хизматларда эса уларни чеклаш ёки блоклаш ваколати бор.
Роскомнадзор Свинтсовнинг “тез орада Telegram VPN орқали ҳам ишламай қолиши мумкин” деган фикрига изоҳ беришдан бош тортган.
“Ъ FM” сўровига кўра, экспертлар Телеграмни блоклаш аллақачон бошланганини айтишмоқда.
