Ўзбекистонда 1765 та масжидда Қуръон хатмоналари бўлади
27 кун давомида ўқилган Қуръони карим 16 март куни хатм қилинади.
Ўзбекистон бўйлаб 16- март куни 27 кун давомида Қуръони Карим ўқилган масжидларда хатмона маросимлари бўлиб ўтади. Бу ҳақда Мусулмонлар идораси хабар берди.
Маълум қилинишича, Қадр кечаси арафасида, яъни Рамазон ойининг 27-кунида мамлакат бўйлаб 1765 та масжидда Қуръон Карим хатм қилинади. Хатмонадан сўнг масжидларда жамоавий дуолар ўқилади.
“Қуръон хатм қилинганидан сўнг қилинган дуо рад этилмайди. Чунки Қуръон Аллоҳнинг каломи бўлиб, уни тўлиқ ўқиб тугатиш улуғ ибодат”, дейилади идора хабарида.
Шунингдек, Мусулмонлар идораси юртдошларни масжидларда ўтказиладиган хатмона маросимларида иштирок этишга чақирган.
