Афғонистондаги касалхонага қилинган ҳужум оқибатида 400 киши ҳалок бўлди
Афғонистон бу ҳужум учун Покистонни айбламоқда, бироқ Исломобод айбловларни инкор этмоқда.
Афғонистон расмийлари Кобул шаҳридаги тиббиёт муассасасига уюштирилган ҳаво ҳужуми оқибатида камида 400 киши ҳалок бўлганини маълум қилди. Дастлабки маълумотларга кўра, яна қарийб 250 киши жароҳат олган.
Афғонистон томони мазкур ҳужум учун Покистонни айбламоқда. Расмийларнинг билдиришича, зарба гиёҳвандликка қарши даволаш хизматларини кўрсатадиган касалхонага берилган. Ҳужум кечқурун содир бўлган ва тиббиёт муассасаси биносига жиддий зарар етказган.
Афғонистон расмийлари ҳужум фуқаролик объектига қаратилганини таъкидлаб, уни халқаро ҳуқуқ нормаларининг бузилиши сифатида баҳоламоқда.
Покистон томони эса бу айбловларни рад этган. Исломобод расмийларига кўра, ҳаво зарбалари Кобул ҳамда Нангарҳор вилоятидаги нишонларга қаратилган бўлиб, улар ҳарбий мақсадларда фойдаланилаётган объектлар бўлган.
Мазкур воқеа Афғонистон ва Покистон ўртасидаги кескинлик кучайиб бораётган бир пайтда содир бўлди. Сўнгги ҳафталарда икки давлат чегараси ҳудудларида отишмалар бўлгани ҳақида ҳам хабарлар тарқалган.
Покистон расмийлари мамлакат ҳудудида содир этилган айрим ҳужумларда иштирок этган жангарилар Афғонистон ҳудудида бошпана топаётганини даъво қилмоқда. Афғонистон эса бу айбловларни инкор этиб, Покистонни ўз суверенитетини бузганликда айбламоқда.
