“АҚШнинг Кубани эгаллаши бу катта шарафдир” — Доналд Трамп
АҚШнинг Кубага нефть етказиб берилишини тақиқлагани фонида мамлакатда блэкаут юз берди.
Қўшма Штатлар президенти Овал кабинетда сўзлаган нутқида Кубани эгаллаш унинг асосий мақсадларидан бири бўлганини айтди. Бу ҳақда CNN хабар бермоқда.
“Кубани бирор шаклда эгаллаш, ҳа, Кубани эгаллаш — яъни уни озод қиламанми, эгаллайманми, мен у билан хоҳлаганимни қила оламан, деб ўйлайман”, — деган Трамп.
Шунингдек, АҚШ Кубага келадиган нефть оқимини тўхтатганидан бери биринчи марта бутун мамлакат бўйлаб блэкаут содир бўлди.
Кубадаги электр тармоқлари оператори, UNE компанияси, узилишнинг аниқ сабаблари аниқланаётганини маълум қилди.
Маълум қилинишича, Куба электр энергияси ишлаб чиқариш ва узатиш тизими жуда эскирган бўлиб, илгари ҳам носозликлар кузатилган. Ҳозир эса ушбу муаммоларга электр станциялари учун ёқилғи етишмаслиги ҳам қўшилди.
АҚШ 2026 йил январь ойида Кубага дўст бўлган Венесуэла етакчиси Николас Мадурони қўлга олганидан кейин, Кубага нефть ва нефть маҳсулотлари етказиб бериш амалда тўхтади.
AFP агентлиги хабар беришича, оролнинг турли ҳудудларида бир неча соатлик электр узилишлари одатий ҳолга айланган. Март ойининг бошида эса мамлакатнинг асосий электр станциясидаги носозлик туфайли мамлакатнинг икки қисмида электр ўчганди.
Reuters агентлиги бу йил Кубадаги портлар фақат иккита кичик ёқилғи кемасини қабул қилганини билдирди. Улардан бири январда Мексикадан Гаванага нефть етказган, иккинчиси февралда Ямайкадан суюқ газ (одатда газ печлари учун ишлатилади) олиб келган.
Венесуэла, илгари Кубага асосий ёқилғи етказиб берувчи давлат бўлган, бу йил ҳеч қандай етказиб бериш амалга оширмаган.
