“Энергосавдо” муҳандиси жаримани камайтириб бериш эвазига пора олаётганда қўлга олинди
У электр энергиясидан ноқонуний фойдаланган фуқаронинг 1,8 млрд сўм миқдордаги жарима суммасини 210 млн сўмга тушириб бериш эвазига пул талаб қилган.
“Ҳудудий электр тармоқлари” АЖнинг “Энергосавдо” филиали Фарғона бўлинмаси муҳандисининг ўз хизмат мавқеидан фойдаланиб фуқародан пора талаб қилгани аниқланди. Бу ҳақда Zamon.uz'га ДХХ хабар берди.
Маълум қилинишича, муҳандис Ўзбекистон туманида яшовчи фуқарога тегишли хонадон ва хусусий боғчада электр энергиясидан ноқонуний фойдаланганлик ҳолати бўйича расмийлаштирилган далолатнома юзасидан ҳисобланган жами 1,8 млрд сўм жарима суммасини 210 млн сўмга тушириб бериш эвазига 10 минг АҚШ доллари талаб қилган.
Муҳандис сўралган пул маблағидан 9 минг АҚШ долларини учинчи шахс орқали олган вақтида қўлга олинган.
Ҳозирда унга нисбатан жиноят иши қўзғатилиб, “қамоқ” эҳтиёт чораси қўлланилди. Тергов ҳаракатлари олиб борилмоқда.
