Эрон ЖЧ-2026 ўйинларини Мексикага кўчиришни таклиф қилди
Бунга Трампнинг Эрон терма жамоаси хавфсизлигини кафолатлашнинг иложи йўқлиги ҳақидаги баёнотлари сабаб бўлган.
Эрон Футбол Федерацияси FIFA билан 2026 йилги Жаҳон чемпионати гуруҳ босқичидаги учта ўйинини Қўшма Штатлардан Мексикага кўчириш бўйича музокаралар олиб бормоқда. Бу ҳақда The Times маълум қилди.
Эрон Футбол Федерацияси президенти Маҳди Тажнинг таъкидлашича, АҚШ президенти Дональд Трампнинг Эрон терма жамоаси хавфсизлигини кафолатлашнинг иложи йўқлиги ҳақидаги баёнотлари фонида жамоа Қўшма Штатларда ўйнамайди.
Шунга мувофиқ, федерация FIFA билан учта ўйинни Мексикада ўтказиш бўйича музокаралар олиб бормоқда.
Жаҳон чемпионатида Эрон терма жамоаси Лос-Анжелесда Янги Зеландия ва Белгия, Сиэтлда эса Миср билан ўйнаши режалаштирилган.
Эрон терма жамоаси Аризона штатининг Тусон шаҳрида жойлашган. Шу билан бирга, Эрон расмийлари АҚШ ва Исроил томонидан февраль ойида бошланган можаролар туфайли бўлажак мусобақани бойкот қилиш имкониятини ҳам кўриб чиқмоқда.
FIFA президенти Жанни Инфантино эса Трамп илгари эронлик футболчиларга Қўшма Штатларга саёҳат қилишга рухсат берганини таъкидлади. Ҳозирча расмий қарор қабул қилинмаган.
2026 йилги FIFA Жаҳон чемпионати 11 июндан 19 июлга қадар АҚШ, Канада ва Мексикада ўтказилади.
